ქ. ბათუმი, ალექსანდრე პუშკინის ქუჩა N100
ნაგებობის მოკლე დახასიათება:
ორსართულიანი აგურის შენობა მაღალი ცოკოლით, რომელშიც სარდაფია მოწყობილი, ქუჩის მჭიდრო განაშენიანებაშია ჩართული. ნაგებობის ფასადი კლასიცისტურ სტილშია შესრულებული, ბაროკული ელემენტების გამოყენებით. ფასადი სიმეტრიულია. კიდეებში ოდნავ შვერილი რიზალიტებია გამოყენებული. რიზალიტებში შესასვლელებია მოწყობილი. შუააში _ თაღოვანი, ეზოში შესასვლელი გვირაბია მოწყობილი, მის მარცხნივ – სადარბაზო. სართულები სადა პროფილის მქონე კარნიზით ერთმანეთისგან არის გამიჯნული. სართულების გაფორმება განსხვავებულია. პირველი სართულის ღიობებს რელიეფური მოჩარჩოება მიუყვება. სარკმლის ძირები ხაზგასმულია მართკუთხა, ჩაკვეთილი სიბრტყეებით, ხოლო ზედა ნაწილში საჭექი ქვებია მოცემული. საპირე რელიეფურია, ტეხილი, ქვის წყობის იმიტაციით, განიერი და ვიწრო ქვების მონაცვლეობით. რიზალიტების კუთხეები პილასტრებით არის დამუშავებული. მთლიანად პირველი სართულის ზედაპირი რუსტირებულია.მეორე სართული სადაა, ცენტრში გადმოკიდებული ლითონის აჟურულმოაჯირიანი აივნით. ზედაპირი ჰორიზონტალურ ღარებით არის დამუშავებული. ღიობებს სადა ჩარჩო მიუყვება. შენობა სრულდება პროფილიანი კარნიზით და წყვეტილი პარაპეტით, რომელიც შენობის ცენტრალურ ნაწილსა და რიზალიტების თავზეა მოცემული და შემკულია ლარნაკებით.
