ი.ჭავჭავაძის ბათუმის დრამატული თეატრი
ქ.ბათუმი, რუსთაველის ქუჩა N1
ძეგლის მოკლე დახასიათება
ბათუმის ილია ჭავჭავაძის სახელობის პროფესიული სახელმწიფო დრამატული თეატრის შენობა 1952 წელს აიგო არქიტექტორ ი. ტეპლიცკის პროექტით. მართკუთხა ფორმის მსხვილმასშტაბიანი ნაგებობა გამწვანებული სკვერის ცენტრში, განაშენიანებიდან განცალკევებით დგას. თეატრის ტერაკოტის ქვითა და მასთან ფერით მისადაგებული დეკორატიული ნალესობით დაფარული ფასადები ყველა მხრიდან კარგად იკითხება. მაღალ ცოკოლზე აღმართული სამსართულიანი შენობა გეგმით ჩამოჰგავს სამნავიან ბაზილიკას, რომლის განიერი და ოდნავ მაღალი შუა ნაწილი ორფერდა, ხოლო გვერდითი ვიწრო ნაწილები ცალფერდა სახურავით არის გადახურული. პომპეზურობით გამოირჩევა შენობის მთავარი ფასადი, საიდანაც მას სამი სართულის მომცველი კვადრატული ფორმის კორინთული სვეტებით შედგენილი და ფრონტონით დაგვირგვინებული პორტიკი აქვს მიდგმული. შეწყვილებული კორინთული პილასტრებითაა გაფორმებული შენობის გრძივი კედლებიც. 2010 წელს თეატრის ფასადები განაახლეს. ოქროსფრად იქნა შეღებილი კარნიზები, სვეტებისა და პილასტრების კაპიტელები და ბაზისები. ნაძერწი თეტრალიზირებული ნიღბები განთავსდა ფრონტონის არეში და გრძივ კედლებზე. ამჟამად მიმდინარეობს თეატრის სარეაბილიტაციო სამუშაოები.ბათუმის თეატრის შენობა საბჭოთა პერიოდის ერთ-ერთი გამორჩეული არქიტექტურული ძეგლია. ის თავისი მდებარეობითა და მასშტაბით დომინანტურ როლს ასრულებს ქალაქის ამ ნაწილის ურბანული სივრცის ჩამოყალიბებაში.
