აჭარის კულტურული მემკვიდრეობის დაცვის სააგენტო

XX ს-ის დასაწყისში აგებული შენობა მოდერნის სტილის ერთ-ერთი გამორჩეული ნიმუშია. შენობაში თავად ნაკაშიძის მფლობელობაში არსებული სასტუმრო ,,ვერსალიც“ იყო განთავსებული.

შენობის კუთხე წაკვეთილია, მას მაღალი, თაღოვანი დასრულება აქვს. შენობის მანსარდის სარკმლის ქვემოთ ნაძერწ მცენარეულ დეკორში სახლის აშენების თარიღია მოცემული: 1912.

მეორე სართულის დონეზე ლითონის აჟურულმოაჯირიანი სარკმელია გადმოკიდული. მოგვიანო გადაკეთებების შედეგად შენობის პირველ სართულს დაკარგული აქვს თავდაპირველი სახე. ის დღეს დიდი შემინული ვიტრინების ღიობებითაა დანაწევრებული. მეორე სართულის სარკმლებიც მართკუთხა ფორმისაა. ამ ფასადზე ყველა დეკორატიული ელემენტი სიბრტყობრივადაა გადაწყვეტილი და სხვადასხვა ფერის გამოყენებითაა ამეტყველებული. კედლების სიბრტყე ამოღარული, კედლის სისქეში ჩაძირული, თარაზული ზოლებით დამუშავებული სვეტებითაა დანაწევრებული, რომელთა ზედა ნაწილებშიც წრეებია განაწილებული. სარკმლის ზემოთ მცენარეულ ორნამენტებიანი მართკუთხა პანელებია ჩასმული. შენობა ნახევარწრიული მოყვანილობის პარაპეტის კედლებით სრულდება, რომლებიც ერთმანეთთან ლითონის აჟურული მოაჯირებითაა დაკავშირებული.