ხელვაჩაურის მუნიციპალიტეტი, სოფ. შუშანეთი
ძეგლის მოკლე დახასიათება
ძეგლი მდებარეობს მდ. ჭოროხის მარჯვენა მხარეს, ხელვაჩაურის მუნიციპალიტეტის სოფ. კირნათის გარეუბან შუშანეთში, ცენტრალური გზიდან 2 კმ-ში. მთლიანი ნაგებობა პატარა ზომის კომპლექსია, სადაც ერთბაშად განთავსებულია საწნახელი, სატრაპეზო და პატარა ზომის ეკლესიაც. კომპლექსი გამართულია ფერდობზე ხელოვნურად შექმნილ ტერასაზე, რომლის სიგრძე 15 მ. ხოლო სიგანე 18 მ. მთლიანი ფართობი 270 მ2-ია. ნაგებობის არქიტექტურაზე დაკვირვებით ჩანს, რომ ჯერ საწნახელი გამართეს, ხოლო შემდეგ დასავლეთით მიაშენეს სატრაპეზო და საყდარი. ასე რომ მთლიანობაში წარმოდგენილი ნაგებობა სამი ნაწილისაგან შედგება. მათგან საწნახელი ყველაზე კარგად შემორჩენილი ნაგებობაა. მისი აღმოსავლეთი კედელი მიშენებულია მიწის ჩამოჭრილ ქანზე. საფასადო ნაწილში გამართულია საწნახელი, რომელიც მიმართულია სამხრეთისაკენ. მთლიან ნაგებობას აქვს თაღოვანი გადახურვა. მშენებლობაში გამოყენებული ქვები კარგად დამუშავებულია. დუღაბი თეთრი ფერისაა და მტკიცეა. საწნახელის შიდა სივრცე შელესილია დუღაბით. იატაკის დონეზე მოწყობილი აქვს ტკბილის გამოსასვლელი, რომელიც ჩადის ისარნაში. საწნახელის ნაგებობა წარმოადგენს მონოლითურ შენობას, რომლის სიგრძე-6,65 მ-ია, ფასადის სიგანე-3,45 მ. თვითონ აბაზანის სიგრძე-2,20 მ. სიგანე-1,05 მ. სიღრმე-80 სმ. წინა საფასადე ხედის საერთო სიმაღლე 3,5 მ-ია. სატრაპეზო რომელიც საწნახელის დასავლეთ კედელზეა მიშენებული თითქმის საძირკვლის დონემდეა მორღვეული. მისი ზომებია: სიგრძე-4,62 მ. სიგანე-6,5 მ. სატრაპეზოზეა მიდგმული პატარა ზომის საყდარიც. ეს ნაგებობაც საძირკვლის დონემდეა დანგრეული. მისი ზომებია: სიგრძე-6,5 მ, სიგანე-5,80 მ. ადგილობრივი მცხოვრებლების გადმოცემით, საწნახელის წინა ეზოში ადრე ყოფილა ქვევრები, რომლებიც განადგურებულია.
