ქ. ბათუმი, ვაჟა-ფშაველას ქუჩა N33
ბათუმის აშკენაზების სინაგოგა 1904 წელს აშენდა არქიტექტორ ს.ვულკოვიჩის პროექტით. ქვის ორსართულიანი, შელესილი და თეთრად შეღებილი შენობა ქუჩიდან ოდნავ სიღრმეში დგას. მავრულ სტილში გადაწყვეტილი მთავარი ფასადის კიდეებში მოწყობილია მძლავრად შვერილი რიზალიტები, რომელთა წინ ქუჩიდან გალავნით მოსაზღვრული მცირე ზომის ვერანდები წარმოიქნება. ფასადის ცენტრი ორ ნახევარსვეტზე გადაყვანილი კილისებრული თაღით შემოწერილ კარს უკავია. შესასვლელისკენ განიერი პარადული კიბე მიემართება. მეორე სართულის ღიობები გამოხატულად ნალისებრი ფორმისაა. შენობა ქონგურებიანი კარნიზით არის დასრულებული.ბათუმის სინაგოგა თავისი ეპოქის უდაოდ ერთ-ერთი გამორჩეული ნაგებობაა. ის ისლამური ელემენტების გამოყენებით შექმნილი ეკლექტური არქიტექტურის კარგი ნიმუშია.
