აჭარის კულტურული მემკვიდრეობის დაცვის სააგენტო

ქ. ბათუმი, ბაქოს ქუჩა N32

ძეგლის მოკლე დახასიათება

XX საუკუნის დასაწყისში აგებული სამსართულიანი ქვით მოპირკეთებული სახლი, ფასადით ი. გოგებაშვილის ქუჩაზე გამოდის. იგი პირველ სართულზე სწორკუთხა, მეორეზე და მესამეზე კი მშვილდათაღოვანი ღიობებითაა დანაწევრებული. პირველი სართულის შუაკედლისებს, თითოს გამოტოვებით რუსტებისაგან შედგენილი პილასტრები აუყვება. აღნიშნულ სართულზე, ცენტრიდან ოდნავ მარცხნივ, ეზოში შესასვლელი თაღოვანი გვირაბია გაჭრი, რომელსაც ლითონის აჟურული ჭიშკარი აქვს შებმული. ჭიშკრის ორივე მხარეს სადარბაზოს კარებებია მოთავსებული. სამივე სართულზე არშიაშემოვლებული ღიობები ზედა ნაწილში საჭექი ქვებით არის აქცენტირებული. პირველი სართულის ხსენებული რუსტების მწკრივების აწვრივ, სართულებსშორის გამყოფ და ფასადის დამასრულებელ სარტყლებს შორის ასევე პილასტრებია მოთავსებული, ოღონდ მათი ზედაპირი გლუვია და ყოველი მათგანი იონიური კაპიტელებით არის დასრულებული. მეორე და მესამე სართულის შუა ოთხ-ოთხი ღიობის წინ, ორი სართულის მომცველი ლითონის შეკიდული აივნებია მიდგმული. ფასადი ორდონიანი შვერილი კარნიზით სრულდება, რომელსაც პარაპეტის კედელი მოსდევს. შენობას, ეზოს მხარეს დაკარგული აქვს თავდაპირველი სახე. მესამე სართული შენობას რამდენიმე წლის წინ დააშენეს, აევე განხორხიელდა მიშენება ეზოს მხრიდანაც. ამისდა მიუხედავად შენობის თავდაპირველი სახის წარმოდგენა შესაძლებელია. აღნიშნული ნაგებობა რენესანსულ-ბაროკული სტილის ნაზავს წარმოადგენს. მას კონკრეტული ქუჩისა და უბნის განაშენიანებაში საყურადღებო და მნიშვნელოვანი როლი აკისრია.