ქ. ბათუმი, ზვიად გამსახურდიას ქუჩა N9
ნაგებობის მოკლე დახასიათება:
ორსართულიანი ბლოკის, ქვით მოპირკეთებული შენობა საერთო განაშენიანებაშია ჩართული და ერთადერთი ფასადით ფრონტალურად იშლება ქუჩის მიმართულებით. გეგმით იგი წარმოადგენს ლათინური U–ს მოყვანილობის კომპოზიციას: მთავარ კორპუსს ეზოს მხრიდან კიდეებში თითო ფრთა ემატება. ეზოს მხრიდან შენობის ძირითად კორპუსს შემინული შუშაბანდები აქვს, რომლის კედლებზე წვიმისაგან დასაცავად თუნუქის ფირფიტებია მიმაგრებული. ქუჩის მხარეს, შენობის სხეულში გაჭრილია ეზოში შესასვლელი სწორკუთხა გვირაბი, მის მარჯვნივ კი სადარბაზოა მოწყობილი. პირველი სართულის დანარჩენი ნაწილი დანაწევრებულია დიდი ზომის სწორკუთხა ვიტრინებით, რომელიც კომერციულადაა ათვისებული. უკეთაა შემორჩენილი შენობის მეორე სართული, რომლებიც სწორკუთხა კარ-სარკმელთა ღიობებითაა დანაწევრებული. შუაკედლისები კი დასერილია ჰორიზონტალური ღარებით. ფანჯრის ღიობები სამკუთხაა ფრონტონიანი სანდრიკებითაა დასრულებული. მათ ჩამოსწვრივ კი მათივე სიგანი სწორკუთხა შვერილებია, შუაში წრეებით. კარის ღიობები ფლანკირებულია ნახევარწრიული პილასტრებით, რომელთა ტოსკანურ კაპიტელებსაც მოსდევს წყვილ-წყვილი შვერილი პროფილირებული კარნიზის დამჭერი კრონშტეინები. კარის ღიობთა ასწვრივ, კრონშტეინებს შორის უწყვეტი დინებით მოთავსებულია შ-სებრი ტალღისებრი ორნამენტები, რომელთა თავზეც მშვილდთაღოვანი ფრონტონებია. მათი ტიმპანები შევსებულია მცენარეული ორნამენტით. ფრონტონთა ზედა ნაწილებში კი მარაოსებრი კომპოზიციებია განთავსებული. მთლიანად შენობა დაგვირგვინებულია წყვეტილი პარაპეტით, რომელიც ერთმანეთთან ლითონის ჭვირული მოაჯირითაა დაკავშირებული.შენობის ბაროკულ-კლასიცისტური იერი, შესრულების მაღალი დონე და ქუჩის აღნიშნულ მონაკვეთში მისი გამორჩეულობა დიდი მნიშვნელობას ანიჭებს უკანასკნელს.