აჭარის სახელმწიფო მუზეუმი
ქ.ბათუმი, ხულოს ქუჩა ხარიტონ ახვლედიანის ქუჩა 4
ძეგლის მოკლე დახასიათება
აღნიშნულ მისამართზე განთავსებული, გეგმაში ლათინური U-ის მსგავსი ორსართულიანი მსშტაბური შენობა, მთავარი შელესილი და შეღებილი ფასადით ჯინჭარაძის ქუჩისკენაა მიმართული. ფასადი ოდნავ შვერილი, რუსტირებული ცოკოლითაა ამაღლებული. მის კიდურა ნაწილებში რიზალიტები გამოიყოფა. პირველი სართულის სწორკუთხა ღიობებით დანაწევრებული კედლის სიბრტყე ჰორიზონტალური და ვერტიკალური ხაზებითაა დასერილი, არათანაბარ სწორკუთხედებად, რაც წყობის იმიტაციას ქმნის. მარჯვენა რიზალიტში მოთავსებულია მთავარი, სადარბაზოში შესასვლელი კარი, რომლის თავზეც სამნაწილიანი ფანჯარაა მოთავსებული, უკანასკნელის განაპირა ფანჯრების ჩამოსწვრივ ასევე პატარა ფანჯრებია. პირველი სართულის ფანჯრები სამკუთხა ფრონტონის მქონე გლუვი ნაშვერებით სრულდება. სართულებსშორის გავლებული, ძლიერ შვერილი თარო-სარტყელსა და ხსენებულ ღიობთა ზედა ჰორიზონტალურ მოჩარჩოებას შორის ხაოიანი ზედაპირის მქონე განიერი სარტყელია გავლებული. თარო-სარტყელი ნაძერწ კრონშტეინებს აყრდნობა. ქვედა ნაწილში კი იონიკების რიგი აქვს გავლებული. მეორე სართულზე, რიზალიტების ფარგლებში დიდი ზომის ღიობებია შუაში მრგვალ ნახევარსვეტებს შორის ჩასმული კარით და გვერდითი ვიწრო სარკმლებით. უკანასკნელთა წინ ლითონის აჟურულმოაჯირიანი შეკიდული აივნებია. რიზალიტებსშორისი კედელი მაღალი თაღოვანი ფანჯრებითაა დანაწევრებული, რომელთა სადა საპირე სართულებსშორის გავლებულ სარტყელამდე ჩამოდის. სარკმელთა ჩამოსწვრივ, მათივე სიგანის ხორკლიანი ზედაპირის მქონე ნაშვერებია მოთავსებული. შენობა სრულდება პროფილირებული კარნიზით, რომელიც ქვევიდან შემაგრებულია კრონშტეინების მწკრივით. ფასადის გაფორმებაში შეინიშნება მოდერნისა და კლასიციზმის სტილთა ნიშნები. აღნიშნული ნაგებობა არ გამოირჩევა მაღალი მხატვრული ღირსებით, მაგრამ კონკრეტული ქუჩისა და უბნის განაშენიანებაში საყურადღებო და მნიშვნელოვან როლს თამაშობს.
