ქ.ბათუმი, რევაზ კომახიძის ქუჩა N4
ქუჩების შეერთების ადგილას აღმართული, 1907-1909 წელს, ეროვნებით სომეხი არტაშეკ სირიანის მიერ აგებული შენობა, თავისი მოხდენილი პროპორციების, მინიატურული ფორმებისა და გემივით წამომართული სილუეტის წყალობით, არაერთ ცნობილ ფილმშია აღბეჭდილი:,,12 სკამი“ (რეჟ. ლეონიდა გაიდაი), ,,მონანიება“ (რეჟ. თენგიზ აბულაძე), ,,არაჩვეულებრივი გამოფენა“ ( რეჟ. ელდარ შენგელაია). შენობის პირველ სართულზე სახელოსნოები იყო განთავსებული. უფრო გვიან დასენებული მეორე და მესამე სართული ოჯახის საცხოვრებელს წარმოადგენდა. ქუჩების გეგმარებას მისადაგებული შენობის დომინანტს სამსართულიანი მოცულობით, სადარბაზო შესასვლელითა და ლითონისმოაჯირიანი მომრგვალებული აივნით აქცენტირებული კუთხის ვიწრო ნაწილი წარმოადგენს. შენობის მოკრძალებული საფასადო დეკორი კლასიციზმის ნიშნებს შეიცავს. იგი ძველი ბათუმის ურბანული მემკვიდრეობის გამორჩეული ნიმუშია.
