ქ.ბათუმი, რევაზ კომახიძის ქუჩა N4
ძეგლის მოკლე დახასიათება
ორი ქუჩის გადაკვეთაზე მდგარი შენობა კუთხის ნაწილში სამსართულიანია, განაპირა ნაწილებში კი ორსართულიანი. მთავარი შესასვლელი წიბოს ვიწრო ფასადიდან აქვს. სადარბაზოს ხის კარი შაბიაბნისფრადაა შეღებილი და არქიტექტურული დეტალებითაა მორთული. გახსნილ ნაწილებში კი ლითონის აჟურული ცხაურებია ჩადგმული. კარი სამი საფეხურით არის ამაღლებული. გვერდებში კი კანელურებიანი და მათ თავზე გლუვი ტოსკანური პილასტრებით არის ფლამკირებული. აღნიშნული სართული კომახიძის ქუჩის მხარეს სწორკუთხა ღიობებით არის დანაწევრებული და იდენტური პილასტრებით არის მორთული. მეორე სართულზე ლითონის მოაჯირიანი აივანი წიბოს ფასადიდან იწყება და კომახიძის ქუჩისკენ უხვევს, შემდეგ წყდება. მის გაყოლებაზე კი თითო-თითო ღიობის მომცველი მსგავსი მოაჯირის მქონე ორი აივანია. ქუჩის მხარეს მეორე სართულის მორთულობა პირველის მსგავსია. ანალოგიურადაა დანაწევრებული მესამე სარტულის კედლებიც. Uკანასკნელი წიბოს ფასადის წახნაგზე ერთი დიდი და მის აქეთ-იქით ორი ვიწრო თაღოვანი სარკმლით ნაწევრდება. შენობა კომახიძის I შესახვევის მხარეს ძალიან გადაკეთებულია: იგი სწორკუთხა ღიობებით ნაწევრდება, მის ცენტრში კი შიდა ვიწრო ეზოში შესასვლელია გაჭრილი. ეზოს ნაწილიც ძლიერ გადაკეთებულია და მისი თავდაპირველი სახის წარმოდგენა ძლიერ ჭირს. ფასადების მორთულობაში შეინიშნება კლასიციზმისა ნიშნები. აღნიშნული ნაგებობა გამოირჩევა მაღალი მხატვრული ღირსებით და კონკრეტული ქუჩისა და უბნის განაშენიანებაში საყურადღებო და მნიშვნელოვან როლს თამაშობს.
