ქ. ბათუმი, ზვიად გამსახურდიას ქუჩა N44 / რევაზ კომახიძის ქუჩა N1
ნაგებობის მოკლე დახასიათება:
ორი ქუჩის გადაკვეთაზე მდგარი ორსართულიანი შენობა, კომახიძის ქუჩაზე გრძივი, ზ. გამსახურდიას ქუჩაზე კი განივი ვასადით გადის. აქედან პირველის ცენტრში თაღოვანი აჟურული ჭიშკრის მქონე თაღოვანი (გვირაბი დღეისთვის დადაბლებულია და თაღის ნაწილში საცხოვრებელი ფართია მოწყობილი) გვირაბია გაჭრილი, რომლის მეშვეობითაც შიდა ეზოში ვხვდებით. შენობა ეზოს ოთხი მხრიდან ფარგლავს, უკანასკნელი ძლიერ სახეცვლილია. ჭიშკრის მარცხნივ სადარბაზოს კარია. შენობის პირველი სართული ქვისაა და მასში გაჭრილია სწორკუთხა ვიტრინები. შუაკედლისებს კი ჩაღრმავებულზედაპირიანი პილასტრები აუყვება. ღიობთა თავზე, სართულებსშორის გამყოფ სარტყელამდე სწორკუთხა კვადრატებისა და მართკუთხედებისგან შედგენილი კომპოზიციებია მოთავსებული. ძალზედ საყურადღებოა ჭიშკრის პორტალის მორთულობა, რომელიც შორეულად მაგრამ მაინც ქართულ ხუროთმოძღვრულ მორთულობასთან პოულობს პარალელებს: თაღოვან, ორად გაყოფილ ღიობს გვერდებში წყვილი, "ბურთულებიანი" და სამაჯურებიანი თავბოლო სამკაულის მქონე ლილვები აუყვება, რომლებზეც გადასროლილია ასევე ორი ლილვისაგან შედგენილი თაღით. პირველი სართული კომერციულადაა ათვისებული. ქუჩათა გადაკვეთის ნაწილში მეორე სართული მოურთავია და მისი კედლები გლუვადაა დატოვებული. რასაც ვერ ვიტყვით კომახიძის ქუჩაზე გამავალი ფასადის დიდი ნაწილზე. უკანასკნელის მორთულობაში შეინიშნება კლასიციზმის ნიშნები. ხსენებული გვირაბისა და სადარბაზოს თავზე ლითონის, აჟურულკონსოლებიანი აივანია, რომელიც გარდა საკუთარი ფუნქციისა წინფარას როლსაც ასრულებს. მსგავსი აივანია ფასადის მარჯვენა განაპირა ნაწილშიც. შენობა საყურადღებო როლს თამაშობს უბინისა და ქუჩის განაშენიანებაში.