ქ. ბათუმი, ეგნატე ნინოშვილის ქუჩა N9 / კონსტანტინე გამსახურდიას ქუჩა N2
ნაგებობის მოკლე დახასიათება:
ნინოშვილის ქ. 9 / კ. გამსახურდიას ქ. 2საცხოვრებელი სახლი სახლი აშენდა XIX-XX საუკუნეთა მიჯნაზე. 1953 წელს ის საფუძვლიანად გადააკეთეს და დააშენეს მესამე სართული. რთული კონფიგურაციის შენობას კვარტლის მთელი სიგანე უკავია და სამ ქუჩაზე გადის. მთავარი ფასადი ნინოშვილის ქუჩაზეა. მას ანაწევრებს ორი მძლავრი რიზალიტი, რომლებიც, სახლის დანარჩენი ნაწილისაგან განსხვავებით, ოთხსართულიანებია. მესამე სართულზე რიზალიტებს სამწახნაგად შვერილი ერკერები აქვს, პირველ სართულზე _ პორტიკები. რიზალიტებს შორის პირველ სართულზე მოწყობილია დახურული გალერეა. გალერეაშიც და პორტიკებშიც გამოყენებულია კვადრატული გეგმის სვეტები, რომლებიც არქიტრავულ გადახურვას იკავებს. გალერეის თავზე მეორე სართულის ვრცელი ვერანდა-აივანია. აივნებია მოწყობილი პორტიკების თავზეც.მესამე სართულზე სახლს აქვს ბეტონისა და ლითონის აივნები. კარ-ფანჯრების ღიობები აქ მონაცვლეობით მართკუთხა და ნახევარწრიულთაღოვანია. მეორე სართულზე რიზალიტების არეებში მოქცეულ კარ-ფანჯრებს მშვილდა თაღები აქვს. შენობის მარჯვენა ნაწილს (ნინოშვილის ქუჩის მხრიდან), რომელიც ამჟამად თურქეთის საკონსულოს უკავია, ბოლოდროინდელი რეკონსტრუქციის კვალი ატყვია. მას აქვს ახალი, უფრო მაღალი სახურავი დიდი სამერცხულების მწკრივით.შენობას არსებითი როლი აქვს სანაპირო ბულვარის მიმდებარე განაშენიანების სახის შექმნაში.
