დ. თავდადებულის ქ.N51 /ს. ზუბალაშვილის ქ. N27
ბათუმის ყოფილი კათოლიკური ეკლესია 1898-1902 წლებში აშენდა პატრი ანსელმ მღებრიშვილის ინიციატივითა და ქართველი მეწარმისა და ქველმოქმედის სტეფანე ზუბალაშვილის შემოწირულობით. მის მშენებლობაზე დაახლოებით 250 000 მანეთი დაიხარჯა. ეკლესიის საკურთხებლად 1903 წელს საგანგებოდ მოიწვიეს ტირასპოლის ეპარქიის ეპისკოპოსი ბარონ ედუარდ დე როპი. ნეოგოთიკური სტილის დარბაზული ეკლესია თეთრი ქვით არის ნაგები. დეკორაციული ელემენტები გამოყვანილია წითელი ქვით. ნავისა და ტრანსეპტის კვეთაზე აღმართულ გამჭოლ კოშკს დასავლეთიდან ორი დიდი კოშკი ეხმიანება. შენობის ფასადები წმინდანთა ქანდაკებებით, ხოლო ინტერიერი მოხატულობით (ძველი და ახალი აღთქმის ამსახველი სცენები) არის შემკული. საბჭოთა პერიოდში ეკლესიას ფუნქცია შეუცვალეს. აქ სხვადასხვა დროს განთავსებული იყო არქივი და მაღალი ძაბვის ლაბორატორია. 1989 წელს აჭარის ავტონომიური რესპუბლიკის მთავრობის გადაწყვეტილებით, შენობა ქართულ მართლმადიდებლურ ეკლესიას გადაეცა. ამჟამად ის ბათუმის ღვთისმშობლის შობის სახელობის საკათედრო ტაძარია.
ეკლესია თავისი ეპოქის ერთ-ერთი გამორჩეულ ნაგებობათაგანი და ნეოგოთიკური არქიტექტურის კარგი ნიმუშია.
