აჭარის კულტურული მემკვიდრეობის დაცვის სააგენტო

შენობა-ნაგებობა მდებარეობს ქალაქ ბათუმში ჭავჭავაძის ქ. ნ 77. პროექტის მიხედვით ირკვევა,რომ აღნიშნული შენობა დაპროექტებულია 1956 წელს, ხოლო მშენებლობა მიმდინარეობდა 1957- 1960 წლებში. შენობა ექსპლოატაციაში შევიდა 1960 წელს და იყო აჭარის პროფესიული კავშირების კულტურის სახლი. ასადაც სისტემატურად იმართებოდა კონცერტები, აჩვენებდნენ კინოფილმებს, იმართებოდა კულტურული ღონისძიებები. შენობა აგებულია სოციალისტური წყობილებისათვის დამახასიათებელ სტილში. 1972 წელს ქალაქის მაშინდელი მთავარი არქიტექტორის გ. ერქომაიშვილის ნებართვის N107/25/ 07 საფუძველზე შენობის ირგვლივ შემოვლებული იქნა რკინა-ბეტონის ღობე. 1994 წლიდან აჭარის უმაღლესი საბჭოს გადაწყვეტილების საფუძველზე აღნიშნული შენობა -ნაგებობა განთავსდა სამხრეთ-დასავლეთ საქართველოს არქეოლოგიური მუზეუმი, სადაც ინახება სხვადასხვა დროს აჭარისა და ქ. ბათუმის ტერიტორიაზე სამხრეთ-დასავლეთ საქართველოს არქეოლოგიური ექსპედიციის მიერ არქეოლოგიურ გათხრებში ნაპოვნი ექსპონატები ბრინჯაოს ხანიდან ვიდრე მე-18 საუკუნემდე

შენობა ქვითაა ნაგები და შელესილია. გაფორმებულია კლასიცისტურ სტილში. ცოკოლის სარტული და ფასადი რუსტირებულია. ფასადი მაღალი თაღებითაა გახსნილი, რომლებიც ემყარება მძლავრ სვეტებს. თაღები შემკობილია ნალესობითა და დეკორით. მცენარეული ხასიათის დეკორაციული ორნამენტებით არის შემკული ფასადზე გამეორებული თაღოვანი ფორმები. შენობაზე ფართო ღიობებია გაწრილი, ხოლო კარნიზის ქვემოთ ორნამენტულ ჩარჩოში, წყვილი მრგვალი სარკმლებია განთავსებული. შენობის კიდურა ნაწილებში სარტულზე სწორკუთხა, -ზე კი ოვალური ფორმის ღიობებია. შენობას ორნამენტული ფრიზი მიუყვება. ნაგებობას ასრულებს პროფილირებული კარნიზი, რომელიც დეკორაციულ კრონშტეინებს ეყრდნობა.

შენობის გვერდები წინა ფასადის მსგავსად, გაფორმებულია თაღოვანი ფორმებით, რომლებშიც სარკმლები და მცირე ზომის აჟურულმოაჯირიანი აივნებია განთავსებული.

უკანა ფასადი არ ხასიათდება მხატვრული დეტალებით.

ამდენად, აღნიშნული შენობა წარმოადგენს საბჭოური არქიტექტურის ერთ-ერთ სახასიათო ნიმუშს. ნაგებობა აღსანიშნავია თავისი მონუმენტურობით, პროპორციულობით, ფასადების გაფორმებითა და კარგი სამსენებლო ოსტატობით.