აჭარის კულტურული მემკვიდრეობის დაცვის სააგენტო - ყოფილი პოლიკნიკა, დემეტრე თავდადებულის ქუჩა N32 / ვახტანგ გორგასალის ქუჩა N47 / ლუკა ასათიანის ქუჩა N37

ქ. ბათუმი, დემეტრე თავდადებულის ქუჩა N32 / ვახტანგ გორგასალის ქუჩა N47 / ლუკა ასათიანის ქუჩა N37

ნაგებობის მოკლე დახასიათება:

დიდი მანსარდით დაგვირგვინებული ორსართულიანი შენობა XX საუკუნის 30-იანი წლების დასასრულსაა აგებული. გასული საუკუნის 40-50-იან წლებში აქ მალარიის საწინააღმდეგო სადგური, შემდეგ ტროპიკულ დაავადებათა ინსტიტუტი, 1951 წლიდან კი, ქალაქის N 1 საავადმყოფო ფუნქციონირებდა. 2010-2012 წლის რეკონსტრუქციის შედეგად სახეცვლ შენობაში 2012 წლიდან ბათუმის ხელოვნების სახელმწიფო უნივერსიტეტი განთავსდა. შენობა მთელ კვარტალს მოიცავს. მთავარი ფასადით იგი ვ.გორგასლის ქუჩისკენ არის მიმართული და ქუჩიდან სიღრმეშია შეწეული. იგი გეგმით წარმოადგენს მორკალულ, ნახევარწრიული მოხაზულობის შეზნექილ მოცულობას, ცენტრში - მძლავრი რიზალიტით. ამ უკანასკნელში განიერი შესასვლელია მოწყობილი. შენობას მორკალვის თითქმის მთელ პერიმეტრზე, ორივე მხრიდან, პირველი სართულის დონეზე გალერეა მიუყვება, რომელიც წვრილი, მოხდენილი პროპორციების მქონე, კანელურებიანი სვეტებით არის დანაწევრებული. გალერეას ბალასინიანი მოაჯირი შემოსაზღვრავს. ძირითად ფასადზე, მეორე სართულის დონეზე, გალერეის თავზე - აივანია მოწყობილი, რომლის მოაჯირი პლასტიკური, მცენარეული ორნამენტით არის შევსებული. მეორე სართულის სწორკუთხა ღიობები, თხელი პილასტრებით არის ფლანკირებული. სარკმლები დეკორატიული საჭექი ქვით შემკული სანდრიკით სრულდება. შენობა სრულდება თარო კარნიზით, რომლის სიბრტყე, რიტმულად არის დანაწევრებული დეკორატიული კრონშტეინებით. ნაგებობა გვირგვინდება სადა პარაპეტით, რომლის ზედაპირი წრეებისა და მართკუთხა სიბრტყეების მონაცვლეობით არის დამუშავებული. შენობის მთავარი ფასადის ცენტრალურ რიზალიტს, შესასვლელის თავზე, მეორე სართულის დონეზე, ქვის გადმოკიდებული, ბალასინიანი აივანი აქვს, რომელიც მძლავრ კრონშტეინებს ეყრდნობა. აივანზე გამავალი ღიობი მაღალი, განიერი და თაღოვანია. თაღი მძლავრი, დეკორატიული საჭექი ქვით არის გაფორმებული და ფლანკირებულია მცენარეული ორნამენტის მოტივებით. მსგავსადაა გაფორმებული რიზალიტის სიბრტყე, კუთხის ზედა სარკმლები და უკანა ფასადის რიზალიტები. შენობის უკანა ფასადი ანალოგიურია, მცირე ცვლილებებით. აქ, გალერეისა და მეორე სართულის ვერანდის მოაჯირი - რიკულებიანია. ღიობები საჭექი ქვების გარეშეა. კუთხის რიზალიტებში სადარბაზოებია მოწყობილი. შენობა კლასიცისტურ სტილში შესრულებული, საინტერესო გეგმარების მქონე ნაგებობაა. მნიშვნელოვანია როგორც თავისი არასტანდარტული კომპოზიციითა და მხატვრული გადაწყვეტით, ასევე, თავისი ფუნქციით და მასშტაბურობით. მას საკვანძო ადგილი უკავია ამ უბნის გეგმარებით სტრუქტურაში.