ქ. ბათუმი, მწვანე კონცხი
ნაგებობის მოკლე დახასიათება:
ორსართულიანი მასშტაბური სახლი ევროპული არქიტექტურული ფორმებით ხასიათდება. მისი ფასადები სხვადასხვა ხუროთმოძღვრული ელემენტებით გემოვნებით არის შემკული. ექსტერიერი, ოთხივე მხარეს საერთო არქიტექტურული ფორმებით არის შემკული, თუმცა კომპოზიციები ერთმანეთისაგან განსხვავდება. შესასვლელის მხარეს მკვეთრად შვერილი განიერი რიზალიტია, რომლის ფარგლებშიც შენობაში შესასვლელი კარი და მასვე დართული პორტიკია მოქცეული. რიზალიტი სიმეტრიულია, შესასვლელის ორსავ მხარეს თითო-თითო სარკმელია მოთავსებული, მეორე სართულზე კი სამი, თანმიმდევრულად განლაგებული ფანჯარაა გაჭრილი. პორტიკი დორიული ორდერის კანელურებით დაღარული, წრიული გეგმის მქონე სვეტებით არის წარმოდგენილი. სვეტები მაღალ ბაზისებზეა შემდგარი. კარი და პორტიკი ეზოს რამდენიმე საფეხურიანი კიბით უკავშირდება, რომელიც შუა ღერძიდან მარჯვნივ, შენობის კიდემდე გრძელდება. სწორედ კიდესთან, კიდევ ერთი შესასვლელია მოქცეული. აღწერილი ფასადი სისადავით გამოირჩევა, სარკმლებს ქვეშ, ორივე სართულზე, უბრალო კარნიზია გავლებული, ღიობები კლასიცისტური თაროებით და მათ ქვეშო მოქცეული თითო-თითო რუსტით არის გაფორმებული, სარკმლებს ასევე სადა ჩარჩო საზღვრავს. შენობის აღნიშნული მხარე, გვერდით ფასადს მომრგვალებული, დაახლ. მეოთხედი წრის ფორმის ნაწილით უკავშირდება, რომელიც ორივე სართულზე, თითო-თითო თაღოვანი სარკმლით არის დანაწევრებული. გვერდითი ფასადიც ასიმეტრიულია. შუა ღერძიდან მარჯვნივ ვიწრო რიზალიტია წარმოდგენილი, მასზე, როგორც ზედა, ასევე ქვედა სართულზე, თითო თაღოვანი სარკმელია გაჭრილი. მეორე სართულზე დატანილ ღიობს, ორსავ მხარეს მართკუთხა გეგმის მქონე, კანელურებით დაღარული სადა პილასტრები ერთვის. ფასადის მარცხენა მხარე, მეორე სართული, შეწყვილებული, ნახევარწრიული გეგმის მქონე კორინთული პილასტრებისა და თაღოვანი სარკმლების თანმიმდევრული მონაცვლეობით არის წარმოდგენილი, რაც კომპოზიციას რიტმულობას მატებს და მას გაწონასწორებულსაც კი ხდის. ქვედა სართულზე გამავალი ფანჯრები შეუმკობელ კედლებშია გაჭრილი. ყველა სარკმელი სადა ჩარჩოთია შემოწერილი. ნაგებობის ყველაზე რეპრეზენტატული ფასადი ძალზე დაზიანებულია. აღნიშნულ მხარეს თითქმის მთელ სიგრძეზე განლაგებული აივანი მონგრეულია. შემორჩენილია სვეტები და პილასტრები. კომპოზიცია სიმეტრიულია. ცენტრში განიერი რიზალიტია წარმოდგენილი. მეორე სართულზე, წყვილი, კორინთული პილასტრებისა და მართკუთხა კარების თანმიმდევრული მონაცვლეობაა. რიზალიტის ორსავ მხარეს თითო კარია დატანილი. პირველ სართულზე თაღოვანი ღიობებია მოქცეული. აქვეა შემორჩენილი აივნის საყრდენი წრიული გეგმის მქონე სვეტი. ფასადი ატიკით გვირგვინდება. შენობას, ყველა მხარეს, სადა კარნიზი ასრულებს. ნაგებობის ექსტერიერი კარგად არის გააზრებული. ის კლასიკური ელემენტებით სადად არის შემკული. აღსანიშნავია, რომ შემკულობის მიხედვით კარგად გამოიყოფა ნაგებობის მთავარი ფასადი, რომელიც ყველაზე რეპრეზენტატულია. ნაკლებად შემკული და შედარებით მორთული მხარეები კი ერთმანეთს აწონასწორებს და საფასადე კომპოზიციას გააზრებულს ხდის.