ქ. ბათუმი, ზვიად გამსახურდიას ქუჩა N18-20 / ჟორდანიას ქუჩა N15
ნაგებობის მოკლე დახასიათება:
გეგმით წაგრძელებული მართკუთხედის მოხაზულობის, ორსართულიანი შენობა ქუჩათა გადაკვეთასთან არის აგებული. იგი გრძივი ფასადით ზ. გამსახურდიას, განივით კი ჟორდანიას ქუჩაზე გადის. მისი პირველი სართული კომერციულადაა ათვისებული და უკანასკნელი დიდი ზომის სწორკუთხა ვიტრინებით ნაწევრდება. შუაკედლისები კი რუსტებისაგან შედგენილი პილასტრებითაა შევსებული. ვიტრინათა თავზე დარჩენილ გლუვ არეებში სწორკუთხა შვერილებია მოთავსებული. სართულებს შორის ჰორიზონტალური სარტყელია გავლებული. მეორე სართულის ყველა ღიობი სწორკუთხაა და სამი მხრიდან პროფილირებული არშია ევლება, ქვედა ნაწილებში კი ყველასთვის საზიარო სარტყელი გავლებული. გრძივ ფასადზე ორი, განივზე კი ერთი ლითონის ჭვირულმოაჯირიანი აივანია მიდგმული. სამივე მათგანს ცალქანობა საჩრდილობლები ბურავთ. მთლიანად შენობა ძლიერ შვერილი თარო-კარნიზით სრულდება, რომლის ძირშიც პატარა თაღების მწკრივისაგან შედგენილი ზოლია გავლებული. შებობის მორთულობის მხრივ თავშეკავებული ფასადების გადაწყვეტაში შეინიშნება კლასიცისტური სტილის ნიშნები. აღნიშნული სახლი არ გამოირჩევა მაღალი მხატვრული ღირსებით, მაგრამ კონკრეტული ქუჩისა და უბნის განაშენიანებაში საყურადღებო და მნიშვნელოვან როლს თამაშობს.