ქ. ბათუმი, ზურაბ გორგილაძის ქუჩა N7 - ლუკა ასათიანის ქუჩა N25
ძეგლის მოკლე დახასიათება
დიდი ზომის ორსართულიანი, მონუმენტური, იმპოზანტური შენობა მაღალი ცოკოლის სართულით, ორი ქუჩის შეერთების ადგილას არის აღმართული. იგი ქვით არის ნაგები და შელესილი. ნაგებობა თითქმის მთელ კვარტალს მოიცავს. მისი ფასადები ფრონტალურად იშლება ორივე ქუჩის მიმართულებით და ამ ქუჩების ზოლიდან სიღრმეშია შეწეული. ფასადების წინ გაზონებია მოწყობილი. შენობის გეგმის კომპოზიციის ძირითად ბირთვს კვადრატი წარმოადგენს, რომელსაც ორივე მხრიდან რუსული UU მოყვანილობის ფრთა ემატება. მთავარი ფასადი ლ. ასათიანის ქუჩისკენ არის მიმართული. ამ ფასადის ცენტრში, შესასვლელს, მძლავრი, ორსაფეხურიანი რიზალიტი ემატება.შენობის პირველი სართულის ზედაპირი რუსტირებულია. სწორკუთხა მოყვანილობის სარკმლებს სადა, პროფილირებული ჩარჩო მიუყვება მძლავრი, რელიეფური საჭექი ქვით ცენტრში. მეორე სართულის თაღოვანი სარკმლები თხელ პილასტრზე დაყრდნობილ არქივოლტით არის გადახურული, რომლის ცენტრი, ორნამენტული საჭექი ქვით არის ხაზგასმული. ღიობებს შორის შეწყვილებული პილასტრებია მოცემული. პილასტრების ქვეშ, სარკმელშორისი ზედაპირი სამ რიგად მოცემულ, ჰორიზონტალურ სიბრტყეებით არის შევსებული. ღიობების ძირის დონეზე, ფასადებს მთელ სიგრძეზე რელიეფური, პროფილირებული თარო მიუყვება, ხოლო თითეული სარკმლის ძირი, ჩაკვეთილი მართკუთხა სიბრტყითაა ხაზგასმული. შენობის მაღალი, შვერილი, კბილანებიანი კარნიზი, გარკვეულ ინტერვალებით მცირე ზომის ფრონტონებით სრულდება. ფრონტონით გვირგვინდება შენობის კუთხეებში მოცემული ოდნავ შვერილი რიზალიტებიც.ნაგებობის მთავარი, ლ. ასათიანის ქუჩისკენ მიმართული ფასადი უფრო სადღესასწაულოდ არის გაფორმებული. ამ ფასადის ცენტრალური ნაწილი მძლავრ, ორსაფეხუროვან რიზალიტს უჭირავს, რომლის შუაგულში სწორკუთხა მოყვანილობის, პროფილირებულ, დეკორატიულ ჩარჩოში მოქცეული კარია გაჭრილი. კარი რელიეფური სანდრიკით სრულდება, რომლის თავზე თაღია გადაყვანილი. შესასვლელი თაღოვანი ფანჯრებით არის ფლანკირებული. მეორე სართულზე განიერი, მძლავრ კრონშტეინებზე დაფუძნებული აივანია მოწყობილი, რომელსაც ბალასინებიანი მოაჯირი აქვს. აივნის უკანა სიბრტყე, თაღოვანი სარკმლებით არის დანაწევრებული. მათ შორის კორინთული ორდერის სვეტებია მოცემული, კუთხეებში - შეწყვილებული. ამ მონაკვეთს, მძლავრი, ფრონტონით დასრულებული ანტაბლემენტი ასრულებს. კარნიზი აქ, დეკორატიული კრონშტეინებით არის გაფორმებული. შენობის ეს ნაწილი გუმბათით არის გადახურული და ბალასინიანი პარაპეტი მიუყვება. გუმბათის თავზე აჟურულმოაჯირიანი აივანია მოწყობილი.კლასიცისტურ სტილში შესრულებული ეს ნაგებობა განსაკუთრებით ღირებულია როგორც თავისი მხატვრული სახით - მონუმენტური, იმპოზანტური იერით, ასევე თავისი გამორჩეული ზომებითა და მასშტაბით. იგი მშვნელოვან, საკვანძო როლს თამაშობს არა მხოლოდ ამ ქუჩების, არამედ მთლიანად უბნის მხატვრული სახის და განაშენიანების ხასიათის ჩამოყალიბებაში.